అనంతరం

జ్ఞాపకాల నీటి ఊట ఈ కవిత

తెలంగాణ, గ్లోబలైజేషన్, రకరకాల డిమాండ్లు, నినాదాలతో వేడెక్కుతున్న రాజకీయాలతో ప్రస్తుతం రాష్ట్ర వాతావరణం కాస్తంత గంభీరంగా ఉంది. ఇటువంటి పరిస్థితులలో గడిచిన కాలంలోని హాయిని, ఆహ్లాదకరమైన వాతావరణాన్ని, సంతోషకరమైన అనుభవాలను నెమరు వేసుకోవడం అందరూ చేసేదే.

కోడూరి విజయ్‌కుమార్ అదే పని చేశారు. కాకపోతే కాసింత కవితాత్మకంగా చేయడం వల్ల అది ‘అనంతరం’ పుస్తకరూపంలో మన ముందుకొచ్చింది. వీటి లో ‘కొన్ని పశ్చాత్తాపాలు, తండ్రులూ... కొడుకులూ..., మూడవ చిత్తరువు, జున్నుపాల వాసన, బాల్యమిత్రుడి ఫోన్‌కాల్, కొన్ని మరణాలు, రెండు ప్రపంచాలు కవితలు బాగున్నాయి. అలాగని మిగతావి బాగోలేదని కాదు...
డాలర్లను ప్రేమించిన మిత్రులకు హితవు పలుకుతూ చెప్పిన...

ఖరీదయిన జీవితం దొరకదనేగదా
ముతకమొహం వాషింగ్టన్ డాలర్ వేటలో వెళ్ళింది
నాలుగు నవ్వు మొహాలు
కనిపించడం లేదని దిగులెందుకు? కవిత కనువిప్పు కలిగిస్తుంది.
సగటు మనిషి జీవితాన్ని వర్ణిస్తూ చెప్పిన...
రెండు దోసిళ్ళనిండా నీటిని తీసుకున్నా
వేళ్ల సందుల్లోంచి అంతా పోగొట్టుకున్నట్టు
నెలంతా శ్రమించి సంపాదించినదంతా
వారంలోపలే అప్పులు, అవసరాల
బొరియల్లోకి యింకిపోతుంది
వారం గడవక ముందే మళ్ళీ వచ్చే
జీతంరాళ్ళ తేదీకై ఎదురుచూడడం
నగర జీవిత నాటకంలోని ఒక సుదీర్ఘ దుర్భర అంకం కవితయథార్ధాన్ని కళ్ళకు కడుతుంది.
రచయితకు కాని, ప్రచురణకర్తలకు గాని దీనిపై లాభాపేక్ష ఏమాత్రం లేదనడానికి దీని ధరే సాక్ష్యం.
ఇంతవరకు మూడు కవితాసంపుటులు, ఏడెనిమిది కథలు, కొన్ని వ్యాసాలు, రెండునాటికలు, పుస్తక సమీక్షలతో రచయితల జాబితాలో చోటు సంపాదించుకున్న విజయ్‌కుమార్ సామాజిక ప్రయోజనకరమైన మరిన్ని మంచి పుస్తకాలతో మన ముందుకొస్తారని ఆశిద్దాం.

- డి.వి.ఆర్.భాస్కర్

పుటలు: 87; వెల రూ. 30, ప్రతులకు: పాలపిట్ట బుక్స్,
6-11-20/6/1/1, 403, విజయ సాయి రెసిడెన్సీ, సలీమ్ నగర్,
మలక్‌పేట, హైదరాబాద్- 36.
ఇ-మెయిల్: palapittabooks@gmail.com